• Þjóðbraut 1, 300 Akranes
  • Mán - Fim: 8:00 - 16:00, Föstudaga 08:00 - 15:15
23
Jul

Félagsmenn VLFA sem starfa hjá Akraneskaupstað og Hvalfjarðasveit fá allt að 105.000 kr. eingreiðslu

Í dag undirritaði formaður Verkalýðsfélags Akraness samkomulag við Samband íslenskra sveitafélags sem tryggir öllum félagsmönnum VLFA sem starfa hjá Akraneskaupstað og Hvalfjarðasveit 105.000 kr. eingreiðslu sem kemur til útborgunar 1. ágúst.

Umrædd eingreiðsla er tilkomin vegna þess að samningsviðræður hafa dregist, en eins og flestir vita þá rann samningur á milli samningsaðila út 31. mars. Þessi eingreiðsla er innágreiðsla vegna væntanlegs kjarasamnings á milli aðila sem verður trúlega kláraður um miðjan ágúst mánuð, nema eitthvað óvænt komi upp í viðræðum milli aðila.

Eingreiðslan greiðist hlutfallslega miðað við starfstíma og starfshlutfall á tímabilinu frá og með 1. apríl 2019 til og með 30. júní 2019. Starfsmenn í fæðingarorlofi og tímakaupsfólk mun einnig eiga rétt á umræddri greiðslu og miðast eingreiðslan hjá tímakaupsfólki við unnar vinnustundir á áðurnefndu tímabili.

Í þessu samkomulagi var einnig samið um að Samband íslenskra sveitafélaga fellst á að hækka launatöflu um 1,5% og mun sú hækkun koma til viðbótar öðrum hækkunum á launatöflu aðila.

Formaður félagsins er afar ánægður með að hægt hafi verið að tryggja að félagsmenn VLFA fengju umrædda eingreiðslu um næstu mánaðarmót og einnig að hægt hafi verið að tryggja að 1,5% komi til hækkunar á launatöflu til viðbótar öðrum launahækkunum sem eftir á að semja um.

Það liggur fyrir að krafa Verkalýðsfélags Akraness er að launahækkanir verði með sambærilegum hækkunum og samið var um í Lífkjarasamningum sem og svokallaður hagvaxtarauki.

Ákveðið var að funda næst 13. ágúst og er formaður verulega bjartsýnn að það takist fljótt og vel að ganga frá nýjum kjarasamningi enda ekki viðunandi að kjarasamningsviðræður séu búnar að dragast í hartnær fjóra mánuði.

Formaður vill þakka bæjarstjóra Akraneskaupstaðar fyrir að leggja sitt lóð á vogaskálarnar til að hægt væri að ganga frá þessu samkomulagi sem tryggir tekjulægstu starfsmönnum sveitafélagsins margnefnda eingreiðslu.

Fréttir

Style Switcher
Layout Style
Predefined Colors
Background Image